Panganaran ma Onde'-Onde'

Ya addat magpandu'an kaonde'an min Kitab, asal addat kabiyaksahan bangsatam Sama. Addat itu asal binogbogan min waktu lagi' saga kambo'-mbo'antam sampay ni kabuwattina'anan. Pinandu'an e' guru angadji' Kitab saga kaonde'an min kariki'-diki' sigām sampay tahapal sigām. Onde'-onde' kasehe'an, anganad isab min Madrasa. Bini'at isab maka pinandu'an saga ka'anakan e' matto'a sigām bang takdil ma pangaddatan ahāp maka pandu' pasal Tuhan. Addat-tabi'at itu subay mbal tinaikutan luba'-lagi'na na buwattina'an aniya' na palman bay sinalin ni bahasa Sinama. Ma bay waktu si Nabi Isa, asal na aniya' addat pagpandu' saga kaonde'an min Kitab. Aniya' ayat ma Kitab Injil, ya yuk-i:

Kata'uwannu isab kahālannu sangay min kariki'-diki'nu sampay ni kaheyanu, bay ka pina'anad asal ma ai-ai tasulat ma deyom Kitab. Ya na ina'an po'onanna angkan ka makapikil anaima' kallum kakkal, ya pamuwan e' Tuhan ma sasuku angandol ma si Isa Al-Masi. (2 Timuti 3.15, Kitab Injil)

Bang pandu'antam saga ka'anakantam min Palman Tuhan, aheya kahāpan maka-ni sigām maka mura-murahan isab makataima' sigām kallum kakkal. Ya itu sababanna bang angay ni kabuwattina'anan, ya saga bebeya'an si Nabi Isa animuk na pa'in saga kaonde'-onde'an maingga-maingga kauman supaya amandu'an sigām pasal pandu' ahāp min Kitab. Aniya' isab saga kapanyapan bay tasulat supaya makatabang amandu'an saga kaonde'an labay min Kitab. Makajari itu ginuna ma saga kaluma'anbi, atawa e' saga guru, sampay ma Madrasa atawa maingga-maingga na lugal pagtimukan saga kaonde'-onde'an.